અરજ કરે છે અબળા, તે ઉર ધારોરે વહાલાજી ૧/૧

 પદ ૪૮૬ મું-રાગ ગરબી(૧/૧)

અરજ કરે છે અબળા, તે ઉર ધારોરે વહાલાજી;

વહાલપણું વાલમજી, માં વિસારો મારા વહાલાજી.

પડવે મારા પ્રાણ લઇને પધાર્યા રે વહાલાજી;

મને રડતી મેલી ન રહ્યા કોઇના વાર્યા મારા               વહાલાજી. ૧

બીજે ક્યાંઇ જાઇ વસિયા, રંગના રસિયા રે વહાલાજી;

ઉદય થયા આવી ગોકુલ શસિયા મારા                       વહાલાજી. ૨

ત્રીજે તમને જોવાને જીવન રે વહાલાજી;

આકુલ વ્યાકુલ થાય છે મારું મન મારા                      વહાલાજી. ૩

ચોથે તમને ચારે દીશે જોઉં રે વહાલાજી;

વ્રહની મારી વ્યાકુલ થઇને રોઉં મારા                         વહાલાજી. ૪

પાંચમે પધારો મારે ઘેર રે વહાલાજી;

અબળા ઉપર રાખો કાંઇક મે'ર મારા                           વહાલાજી. ૫

છઠે આવો છેલા છોગાલાં મેલી રે વહાલાજી;

જોવા સારું તલખે સૌ સાહેલી મારા                             વહાલાજી. ૬

સાતમે આવો તો શોભા કરિયે રે વહાલાજી;

હાર પે'રાવી સુંદર છોગલાં ધરિયે મારા                      વહાલાજી. ૭

આઠમે આવોને પ્રાણાઆધાર રે વહાલાજી;

કાંઇ કરુણા રાખો કેસરના અસવાર મારા                     વહાલાજી. ૮

નોમે નવલા નેહ વધારો આવી રે વહાલાજી;

સુખ આપો શામળિયાજી બોલાવી મારા                       વહાલાજી. ૯

દશમે દુ:ખિયાં કીધાં સૌ નરનારી રે વહાલાજી;

આ ક્યાંથી આવી પુતના સમ હત��યારી મારા                વહાલાજી. ૧૦

એકાદશીનો ઓછવ આવ્યો આજ રે વહાલાજી;

આવો મુનિ મંડળને દરશન દેવા કાજ મારા                વહાલાજી. ૧૧

બારસે બહુ ભાતે કર્યાં મેં થાળ રે વહાલાજી;

તમે જમવા સારું આવો દીનદયાળ મારા                    વહાલાજી. ૧૨

તેરસે તમ કાજે ઢોલિયો ઢાળી રે વહાલાજી;

વાટડલી જોઉં છું ચોક વાળી મારા                              વહાલાજી. ૧૩

ચૌદશે મને ચિંતા થાય છે ભારી રે વહાલાજી;

હરિ નવ આવ્યા મને શે વાંકે વિસારી મારા                વહાલાજી. ૧૪

પુનમે પધારો પૂરણચંદ રે વહાલાજી;

વદન વિલોકી સૌ પામે આનંદ મારા                           વહાલાજી. ૧૫

મનના મનોરથ કરજો મારા પૂરા રે વહાલાજી;

નિજ જનના કારજ કરવા છો શૂરા મારા                      વહાલાજી. ૧૬

તિથીઓ ગાઇને પ્રેમાનંદ એ માગેં રે વહાલાજી;

રહો સહજાનંદજી આંખડલીને આગે મારા                    વહાલાજી. ૧૭

 

મૂળ પદ

અરજ કરે છે અબળા, તે ઉર ધારોરે વહાલાજી

રચયિતા

પ્રેમાનંદ સ્વામી

ફોટો

કિર્તન ઓડિયો / વિડિયો યાદી

કોઈ ઑડિયો / વીડિયો ઉપલબ્ધ નથી