ઓધવ વ્રજવિનતાની વિનતિરે૨/૪

પદ ૫૩૪ મું(૨/૪)

ઓધવ વ્રજવિનતાની વિનતિરે, કહેજો કૃષ્નજીને જરુર જો;  ઓધ૦ ટેક.

વહાલા વ્રજવિનતાના નેણથીરે, તમને ન ઘટે રહેવું દૂર જો.  ઓધ૦ ૧

તમે હરિ વ્રજવાસીના પ્રાણ છોરે, પ્રાણ વીનાનો નવ રહે દેહ જો;

નીર વીનાની જીવે માછલીરે, એવો વ્રજવાસીનો સ્નેહ જો.  ઓધ૦ ૨

અમને એમ કહી હાર તમે ચાલીયારે, હમણાં આવું છું તમ પાસ જો;

મથુરામાં મામાને આવું મળીરે, પ્રાણ રહ્યા છે એ વિશ્વાસ જો.  ઓધ૦ ૩

જો હરિ આવી પાછા નહીં મળો રે, તો અમે તરત તજીશું પ્રાણ જો;

એ આંટી હરિ વ્રજઅબળાતણીરે, તે તમે જાણજો શ્યામ સુજાણ જો ઓધ૦ ૪

સુનાં ગોકુળમાં ગમતું નથીરે, ઘર વન સરવે ખાવા ધાય જો;

પ્રેમાનંદના પ્યારા તમ વીનારે, પળ એક કલપ સરીખી જાય જો.  ઓધ૦ ૫

મૂળ પદ

તમેરે ઓધવ કહેજો એટલીરે,

રચયિતા

પ્રેમાનંદ સ્વામી

ફોટો

કિર્તન ઓડિયો / વિડિયો યાદી

કોઈ ઑડિયો / વીડિયો ઉપલબ્ધ નથી