ઓરા આવો સુંદર શ્યામ રે પુછું વાતલડી૧/૪

 પદ ૧૮૮૩ મું. –રાગ ગરબી.૧/૪

ઓરા આવો સુંદર શ્યામ રે પુછું વાતલડી;

ક્યાં જીત્યા ચતુર સંગ્રામ રે રંગભર રાતલડી. ૧

ક્યાં કીધા અધરરસ પાન રે રસિયા રંગ રમતા;

કુણ મળી ચતુર એવી કાન રે થયા હરિ મન ગમતા. ૨

કેઇ રીતે કીધા સનમાન રે ચતુરવર પાતળિયા;

કેમ વણ્યાં રસિક એવાં વાન રે સુંદર શામળિયા. ૩

કેઇ રીતે દેખાડ્યા દાવ રે, વહાલપ વેણાંમાં;

કેઇ રીતનાં કીધાં હરિ ભાવ રે સુંદર નેણામાં. ૪

કેઇ રીતની સમજાવી સાન રે હસી લીધી તાળી;

તે સાનમાં થયા છો ગુલતાન રે મોહન વનમાળી. ૫

કેઇ રીતે મટ્યા સર્વે ખેદ રે, મોહન મરમાળા;

પ્રેમસખી પુછે એ ભેદ રે છેલવર છોગાળા. ૬

 

 

મૂળ પદ

ઓરા આવો સુંદર શ્યામ રે પુછું વાતલડી

રચયિતા

પ્રેમાનંદ સ્વામી

ફોટો

કિર્તન ઓડિયો / વિડિયો યાદી

કોઈ ઑડિયો / વીડિયો ઉપલબ્ધ નથી