પદ ૨૨૧૫ મું. –રાગ ધોળ, વિવાહનો .૧/૪
નિરખી નૌતમ નાથને, નેણા ઠરિયાં;
રસિયો રૂપનિધાન, નેણા ઠરિયાં. ટેક
શોભે ગોઠીડાના સાથમાં, નેણા ઠરિયાં;
ભુધર ભીનલે વાન, નેણા ઠરિયાં ૧
માથડે મોળિયું હેમનું, નેણા ઠરિયાં;
કેસર તિલક ભાલ, નેણા ઠરિયાં,
હસવું ભરેલ પ્રેમનું, નેણા ઠરિયાં;
જોયા જેવી ચાલ, નેણા ઠરિયાં. ૨
કલંગી બિરાજે વાંકડી, નેણા ઠરિયાં;
બાંધણી આંટાદાર, નેણા ઠરિયાં.
આંખડી કમળ કેરી પાંખડી, નેણા ઠરિયાં;
કુંડલ મકરાકાર, નેણા ઠરિયાં. ૩
નાસા નમણી શોભતી, નેણા ઠરિયાં;
ભ્રકુટી કામ કબાણ, નેણા ઠરિયાં.
ચિતવનિ ચિત્ત લોભણી, નેણા ઠરિયાં;
વારું વદનપર પ્રાણ, નેણા ઠરિયાં. ૪
વામ શ્રવણમાં શ્યામ છે, નેણા ઠરિયાં;
તીલ એક અતિ છબીદાર, નેણા ઠરિયાં
ગોલ કપોલમાં તીલ છે, નેણા ઠરિયાં;
જમણી કોરે સાર, નેણા ઠરિયાં. ૫
મૂરતિ સદા સુખકંદની, નેણા ઠરિયાં;
ઉરમાં રહો રંગરેલ, નેણા ઠરિયાં.
વિનતિ પ્રેમાનંદની, નેણા ઠરિયાં;
સાંભળો રંગછેલ, નેણા ઠરિયાં. ૬