પદ-૨ …………..૨/૨
!! શ્રીકૃષ્ણ નારાયણની લીલાનું સ્મરણ !!
સખી જુઓ (૩) શ્રી કુંજવિહારી
રમે ગેડી લઇ ગિરધારી; ટેક
સરખા લઇ બાળક સંગે
જુઓ રમે અધિક ઉછરંગે;
શોભે છે શામળ રંગે ;
કરી ખુબ ખેલ, રમે રંગ રેલ, છબીલો છેલ;
જુએ નરનારી , રમે ગેડી લઇ . (૧)
જુઓ દડા (૩) સંઘાતે દોટ, દઇને ન ચૂકે હરિ ચોટ;
દૈતોના માથાં આમ,
રખડાવીશ ઠામો ઠામ.
એમ સુચવે શ્રી ઘનશામ;
રૂડુ જુઓ રૂપ , બન્યુ છે અનુપ, લાજે રતિભુપ૧
જોઇ મોરારી, રમે ગેડી લઇ . (૨)
શિર ધર્યો (૩) મુગટ જદુનાથે, ગેડીને ગ્રહી છે હાથે,
કુંડળ બેઉ કાને શોભે,
ખરે રવિ શશી મન ક્ષોભે ,
જોઇ જોઇને મનડુ લોભે,
ગળે મણીમાળ , ધરી છે રસાળ, જુઓ પ્રતિપાળ
ઉભા અવતારી , રમે ગેડી લઇ . (૩)
મુખ હસે (૩) જુઓ મંદ મંદ, શોભે છે શરદનો ચંદ
શ્રમજલના૨ બિંદુ કપોળે,
જાણે મોતી થયા ત્યાં ટોળે,
મહા મોટા મુનિવર ખોળે;
અહો ! સખી આજ, એવા વૃજરાજ, મળ્યા મહારાજ;
સદા સુખકારી, રમે ગેડી લઇ . (૪)
નિજસખા (૩) ને લાડ લડાવે, આનંદ આનંદ ઉપજાવે;
જુઓ વિશ્વવિહારી લાલ,
કરે ખુબ નિજ જનમાં ખ્યાલ,
બહુ વહાલા લાગે આ બાલ;
પુરી કરી પ્રીત, ખાંતિલે ખચિત, ચોર્યુ મુજ ચિત્ત;
રિઝુ ઉર ધારી, રમે ગેડી લઇ. (૫)
_______________________________________________
૧. રતિભુપ = કામદેવ
૨.શ્રમજલના બિંદુકપોળે= પરસેવાથી કપાળમાં મોતીના