પદ- ૨૨ ……………૨/૨
.!! સ્વપ્નમાં શ્રીકૃષ્ણ નારાયણના દર્શન વિષે. !!
આજ તણી રજનીમાં મને , સ્વપ્ન આવિયું;
દર્શન દીનબંધુનું, રૂડી રીતે થયું. આજતણી (ટેક)
જાણે કોટી સૂરજ શશી, ઉગ્યા અંગમાં,
ગોવાળ તણા બાળ સખા, શોભે સંગમાં. આજતણી. (૧)
બંશીધર બંશી હાથમાં, ધરી હતી;
મૂરતિ જોઇ મોહ પામી ગઇ, મારી મતિ. આજતણી (૨)
મોર તણો મુગટ શિશ, કુંડળ કાનમાં;
તનન તનન તાલ વિષે, ગાય તાનમાં. આજતણી (૩)
કમળ તણી માળા, કાજુ કંઠમાં ધરી;
મુખ ત્ણે મરકલડે મારું, મન લીધું હરિ. આજતણી (૪)
હીરાગળ પીળું વસ્ત્ર, ધર્યું કટિ વિષે;
પાદુકા પાદાર્વિંદમાં, છે રૂડી દીસે. આજતણી (૫)
કમળ નેણ કૃષ્ણ, વિમળ વેણ ઉચર્યા;
બહુનામીના બોલ મારા, મન વિષે ઠર્યા. આજતણી (૬)
કમળાવર રાધાવર, જે જદુપતિ;
તે તણી કરી મેં પ્રીતે, વિમલ વિનતિ. આજતણી (૭)
હૃદય રૂપી મંદિરમાં, પધરાવિયા હરિ;
સેવા મારી અંગિકાર, શ્રી હરિએ કરી. આજતણી (૮)
વા'લ આણી વા'લે મને, વરદાન આપિયું;
કષ્ટ મારું કોટી જન્મ, તણુ કાપિયું. આજતણી (૯)
વિશ્વવિહારીલાલજીનાં, લીધાં મીઠડાં;
સ્વપ્ન વિષે સદૈવ એવાં , આપો સુખડાં. આજતણી (૧૦)
________________________________
મરકલડે= મુખ મલકાવવું તે