પદ- ૨૨૫ ……………….૧/૧
ગ્રંથને આશિષ. (સવૈયો)
જ્યા સુધી શેષ ધરે ધરણી શિર, ચંદ્ર રવિ નહીં લે જ વિસામો,
જ્યાં સુધી લક્ષ્મી કરે હરિસેવન, ગંગતરંગ વિષે જળ જામો;
જ્યાંસુધી સત્ય વસે સચરાચર વિપત્તિનો નહીં વેગ વિરામો,
ત્યાં સુધી આ શુભ ગ્રંથ અવિચલ, વિશ્વ વિષે જયકાર જ પામો. (૩)
(દોહરો)
દિવ્ય શતક વર્ષો જતાં, ભાંગે કદી બ્રહ્માંડ,
તો અક્ષરનાં મુક્તના, મુખમાં વસો અખંડ. (૪)
_____________________________________________
વિપતિ= વિ-પતી-પતિ-સ્વામી-પતીનો સ્વામી ગરૂડ.
ગ્રંથાધિકારી ( હરિગીત છંદ)
તજી મોહમાયા કપટ છાયા, જ્ઞાનમાં ગરકાવ છે,
જેને પ્રગટ શ્રીભક્તિસુતની, ભક્તિમાં બહુ ભાવ છે,
માયિક શબ્દાદિક વિષયથી, જેનું ઉર અવિકારી છે,
એવા વિવેકી વૃંદજન આ ગ્રંથના અધિકારી છે. (૫)
(મનહર છંદ)
રાગ રાગણીનું જેના અંતરમાં જ્ઞાન હશે,
તેવા જન તો જરૂર રાગને વખાણશે;
કવિતાના કોડિલા જે કાવ્યમાં ચતુર નર,
એવા જન કાવ્યના વિચાર ઉર આણશે;
ફાવે તે સ્વિકારો ભલે ન ફાવે તો નિંદશો માં,
કથન કહું છું તે આ પ્રીતેથી પ્રમાણશે;
સંતોષ દેનાર જ્ઞાન ભંડાર આ ગ્રંથમાંથી,
હરિજન હરિગુણ વિષે ગુણ જાણશે.. (૬)
(દોહરો)
હરિને હરિના જન સદા, પૂરણ થાય પ્રસન્ન;
એ ઇચ્છા મુજ અંતરે , નહિ ઇચ્છા ઉર અન્ય. (૭)
ગ્રંથશ્રુતિફળ
(છપય છંદ)
પ્રગટ ચરિત્ર પવિત્ર, કહ્યાં છે વિમળ વખાણી,
જીવનરૂપ જરૂર, હરિજનને છે જાણી;
સુણશે ધરિને સ્નેહ, હૃદયમાં શાંતિ થાશે;
ક્લેશ અને કંકાશ, દુઃખ સઘળા દૂર જાશે,
પ્રગટ પ્રભુની ભક્તિને, સહેજે તે નર પામશે,
નિજ ભૌતિક પિંડ પડ્યા પછી, અક્ષરધામ વિષે જશે. (૮)
(દોહરો)
જે નર સ્નેહ વડે કરી, સુણે ન હરિ ગુણગાન;
તેના કાન સરપ તણા, જાણો બિલ સમાન. (૯)
ગ્રંથાંતેહરિસ્મરણ.
(વસંતતિલકાવૃત્તમ્)
આનંદ કંદ મૂર્તિ વૃષકુળચંદ,
છે મંદ મંદ હસતુ, સુમુખારવિંદ;
જેનું કરે સ્તવન છંદ અને મુનિંદ;
વંદુ હું તેહ હરિનું ચરણારવિંદ (૧૦)
જે પાદપદ્મ થકિ ઇડ કટાહ ફોડ્યું,
જે પાદપદ્મે શકટાસુર માન તોડ્યું;
જે પાદકંજથી કર્યો, દુઃખી કાળીનાગ,
તે પાદપંકજ તણો મહિમા અથાગ. (૧૧)
___________________________________
બિલ= સરપનુ દર.