૯૩ પદ-૨/૨
શ્રીઘનશ્યામ સુંદરવર રંગના રસિયા રે, શામળિયા;
વાલમજી મુજને મેલી ક્યાં જઇ વસિયા,પ્રીતમ પાતળિયા… ૧
પડવે ફરું ચરણ કમળને જોતી રે, શામળિયા;
તે ચિહ્ન સહિત સંભારી રહું છું રોતી, પ્રીતમ પાતળિયા… ૨
બીજે નખ તારા બાલચંદ્ર અનુસારી રે, શામળિયા;
તેનુ ધ્યાન ધરી ભરી આવે છાતી મારી,પ્રીતમ પાતળિયા ૩
ત્રીજે જંઘા જાનું જોવા સારુ રે, શામળિયા;
મન તલખે જેમ મીન કાઢ્યું જળ બારું, પ્રીતમ પાતળિયા… ૪
ચોથે ચારુ સાથળ જોવા તારા રે, શામળિયા;
અતિ આકુળ વ્યાકુળ થાય લોચન મારા, પ્રીતમ પાતળિયા…૫
પાંચમે પ્રભુ કટી ભાગ દિલ જોતા રે, શામળિયા;
પાર ન આવે દુઃખડાંનો સંભારી રોતાં, પ્રીતમ પાતળિયા… ….૬
છઠ્ઠે છેલા તારી વર્તુળ નાભી ગંભીર રે, શામળિયા;
તેને સંભારી ઉર મારે રહે નહિ ધીર, પ્રીતમ પાતળિયા……..૭
સાતમે સર્વ સુખનિધિ ઉદર તમારું રે, શામળિયા;
તેને સંભારી મન પરવશ થાય છે મારું, પ્રીતમ પાતળિયા…૮
આઠમે મન અટક્યું જોવા કાજ રે, શામળિયા;
ઉર ઉન્નત રમા રમણ શ્રીવ્રજરાજ, પ્રીતમ પાતળિયા……..,,,૯
નોમે નવરંગ સ્તનમણિ તારા શ્યામ રે, શામળિયા;
તેને સંભારી મને નથી થાતો આરામ, પ્રીતમ પાતળિયા… ૧૦
દશમે દરદ થયો દિલમાં અતિ ભારી રે, શામળિયા;
જન રક્ષક તારા ભુજા જુગલને સંભારી, પ્રીતમ પાતળિયા…૧૧
એકાદશીએ કંઠ કંબુ આકાર રે, શામળિયા;
તેને જોવા તલખે મનડું વારમવાર, પ્રીતમ પતળિયા……. ..૧૨
બારસે વાલમ તારા અધર પ્રવાળ રે, શામળિયા;
. તેને ચિંતવતાં દિલમાં દુઃખ થાય વિશાળ,પ્રીતમ પાતળિયા.૧૩
તેરસે તિલ ફૂલ થકી અતિ સાર રે, શામળિયા;
તારી નાસાચિંતવી જગ સુખનરે’ લગાર,પ્રીતમ પાતળિયા.. …૧૪
ચૌદશે ચિંતવતાં તમારા નેણ રે, શામળિયા;
મ્રુગ ખંજન કમળ થયા અતિ દુઃખ દેણ, પ્રીતમ પાતળિયા…૧૫
પૂનમે પાતળિયા આવો મારે ઘેર રે, શામળિયા;
તમે નિજજન ઉપર રાખો કાંઇક મે’ર, પ્રીતમ પાતળિયા… …૧૬
સિદ્ધાનદની અરજી અંતર ધરજો રે, શામળિયા;
શ્રીસહજાનંદજી આવી આનદ કરજો, પ્રીતમ પાતળિયા… …૧૭