વસંત વધાવા વ્રજની નારી નંદરાય ઘેર આવી  ૧/૪

વસંત વધાવા વ્રજની નારી, નંદરાય ઘેર આવી ;

કાજુ કાન કુંવરને કાજે, વસન વસંતી લાવી. વસંત૦ ૧

ઝીણો કમર પટો પાયજામો, અંગરખી ફૂલકયારી ;

ચોલ કસુંબી રંગમાં સુંદર, પાઘડલી છટકારી. વસંત૦ ર

કોઇ લાવી ફૂલડાંની માળા, કોઇ સોનાનો દોરો ;

કોઇ લાવી સુંદર ગૂંથીને, ફૂલડાં કેરો તોરો. વસંત૦ ૩

કેસર ચંદન ત્યાર કરીને, કંચન ભરી કચોળી ;

ચતુર ત્રિયા ચાંદલિયા સારુ, લાવી કુમકુમ ઘોળી. વસંત૦ ૪

કનક કલશમાં ધરિયાં કાજુ, આંબા મોર ને ઉંબી ;

બ્રહ્માનંદના વહાલાની પાસે, રહી સર્વે લૂંબીઝૂંબી. વસંત૦ પ

મૂળ પદ

વસંત વધાવા વ્રજની નારી

રચયિતા

બ્રહ્માનંદ સ્વામી

ફોટો

કિર્તન ઓડિયો / વિડિયો યાદી

કોઈ ઑડિયો / વીડિયો ઉપલબ્ધ નથી