વ્હાલા સુંદર શ્યામ સુજાણ મારે ઘેર આવો રે ૫/૯

વ્હાલા સુંદર શ્યામ સુજાણ, મારે ઘેર આવો રે;

મારા પ્રાણ તણા આધાર, મન ઘણું ભાવો રે. ૧

તારી વાંસલડી વ્રજરાજ, ચિતડું ચોરે રે;

તારાં નયણાં નંદકુમાર, કાળજ કોરે રે. ર

તારી ઘુઘરડીનો ઘોર, ઘમઘમ બોલે રે;

તે સુંણતાં સુંદર શ્યામ, મન મારૂં ડોલે રે. ૩

તારા ઝાંઝરનો ઝણકાર, અતિ સુખકારી રે;

તારી છબી પર સુંદર શ્યામ, જાઉં બલહારી રે. ૪

વ્હાલા ઉર મુક્તાફળ હાર, સુંદર છાજે રે;

તેને નિરખી કોટિક કામ, શોભા લાજે રે. ૫

વ્હાલા એ છબી ઉરમાં નાથ, નિશદિન રહેજ્યો રે.

મુક્તાનંદ કહે મહારાજ, દર્શન દેજ્યો રે. ૬

મૂળ પદ

વાલા રમઝમ કરતાં કાન

રચયિતા

મુક્તાનંદ સ્વામી

ફોટો

કિર્તન ઓડિયો / વિડિયો યાદી

કોઈ ઑડિયો / વીડિયો ઉપલબ્ધ નથી