મારે મંદિર આવો માવ રંગભર રમીએ રે ૮/૯

મારે મંદિર આવો માવ, રંગભર રમીએ રે;

વ્હાલા ભોજનીયાં બહુ ભાત્ય, જમાડું તે જમીએ રે. ૧

મેં તો ફૂલડે સમારી સેજ, માણો તમે માવા રે;

મારે મંદિર રાખું માવ નહિ દઉં જાવા રે. ર

મુને તમ વિના જે પળ જાય, તે ઘણું સાલે રે;

તારી લાલચમાં નંદલાલ, પ્રોવાણાં ભાલે રે. ૩

મુને સુળી જેવો સંસાર,સધળો લાગે રે, ;

જાણું ક્યારે મળે નંદલાલ, દુ:ખડું ભાગે રે. ૪

મુને રજની તે વેરણ્ય થાય, તમ વિના વહાલા રે;

આપો સુખડું અલૌકિક શ્યામ, શ્રીનંદલાલા રે. ૫

વહાલા અબળા ઉપર મહેર, કરજ્યો મોરારી રે,

મુક્તાનંદ કહે મહારાજ, દાસી તમારી રે. ૬

મૂળ પદ

વાલા રમઝમ કરતાં કાન

રચયિતા

મુક્તાનંદ સ્વામી

ફોટો

કિર્તન ઓડિયો / વિડિયો યાદી

કોઈ ઑડિયો / વીડિયો ઉપલબ્ધ નથી