આવ સખી ! એકાંતે કહું, તુંને વહાલાની વાતું બેની ૨/૪

 

આવ સખી ! એકાંતે કહું, તુંને વહાલાની વાતું બેની ;

પાડોશણશું પ્રીત કરી, તે નથી ખમાતું બેની. ૧

દહાડી તેનો મંદિરીઆમાં, અણતેડયો આવે બેની ;

એનું મુખડું ભાળી ભાળી, તાળી દેઇ ગાવે બેની. ર

જેવે તેવે મન નવ માને, રંગ નવલે રાચે બેની ;

એને આગે આંટી મેલી, નચવે તો નાચે બેની. ૩

બીજાના તો મેવા મીસરી, મીઠાં નવ લાગે બેની ;

એને આગે ઓશિયાળા થઇ, મહી માંખણ માગે બેની. ૪

કંઇ પેરના કાનકુંવરને, કામણિયાં કીધા બેની ;

એ આગે તો એમ વરતે, જાણે વેચાતા લીધા બેની. પ

એના ઘરની સરવે ચિન્તા, ઉપાડી માથે બેની ;

બીજા શું તોઅવળા વરતે, સુધા એ સાથે બેની. ૬

એને આગે ડરતા ડરતા, છોગાળો ચાલે બેની ;

એને ઘેર એકાંતે જઇને, મનગમતું મ્હાલે બેની. ૭

વાલોજી એને મન વસીયા, એને એ પ્યારી બેની ;

બ્રહ્માનંદનો વાલો વશ કીધા, ધન્ય તે વ્રજનારી બેની.  ૮

મૂળ પદ

સાચું બોલો શ્યામ સલૂણા

રચયિતા

બ્રહ્માનંદ સ્વામી

ફોટો

કિર્તન ઓડિયો / વિડિયો યાદી

કોઈ ઑડિયો / વીડિયો ઉપલબ્ધ નથી