અમાવાસ્યે અમે કેમ કરી રહેવાય રે, વાલાને,
તમ વિના ખાલી ગોકુળ ખાવા ધાય, કહો નંદલાલાને. ૧
પડવે પ્રાણ અમારા રે તેમ કરજો રે, વાલાને,
ઉર વિચારી મથુરા સામાં પગ ભરજો, કહો નંદલાલાને..... ર
બીજે નથી અમારે નેણ ગુજારો રે, વાલાને,
ઉછેરી અમને વણ મોતે કાં મારો, કહો નંદલાલાને..... ૩
ત્રીજે તલફે વ્રજ વનિતાનાં વૃંદરે, વાલાને,
મોહન મુખ જોવા જેમ ચકોરી ચંદ્ર, કહો નંદલાલાને.... ૪
ચોથે ચાતક સ્વાંત તણું જળ પીવેરે, વાલાને,
તેમ તમને જોઇને યુવતીઓ જીવે, કહો નંદલાલાને...... પ
પાંચમે પરવશ અમને મા જાશો મેલીરે, વાલાને,
અમ અબળાને બીજો નથીકોઇ બેલી, કહો નંદલાલાને...... ૬
છઠે લેખ લખ્યા અમારા અવળારે, વાલાને,
રસિયા રહો તો સર્વે થઇ જોય સવળા, કહો નંદલાલાને...... ૭
સાતમે સુખના સાગરમાંથી કાઢી રે, વાલાને,
વિષ કૂવે મેલો માં વ્રત વાઢી, કહો નંદલાલાને...... ૮
આઠમે મેલી અલબેલો ન જાય રે, વાલાને,
સુના મંદિરીયે અમને ન સુવાય, કહો નંદલાલાને...... ૯
નોમે નવ જોબન જાળવ્યું જે કાજરે, વાલાને,
તમ વિના તે થાય નરકનો સાજ, કહો નંદલાલાને...... ૧૦
દશમે સુખ દીધું મંદિરમાં મહાલી રે, વાલાને,
દાઝે દીલમાં ખાટ દેખીને ખાલી, કહો નંદલાલાને...... ૧૧
એકાદશી દેવ ઉઠણી ઉત્સવ દિનરે, વાલાને,
શોક અમારે અંતર રહે તમ વિન. કહો નંદલાલાને...... ૧ર
બારસે બહુ હેત કરી બળવીર રે, વાલાને,
રહે આંખો આગે સુંદરશ્યામ શરીર, કહો નંદલાલાને...... ૧૩
તેરસ પીવા ચિત અમારૂં ચાય રે, વાલાને,
અધરામૃત એકાંતે આવી પાય , કહો નંદલાલાને...... ૧૪
ચૌદશ કાળીને આદિત વાર રે, વાલાને,
એ નહિ આવે અમારે અવસર સાર, કહો નંદલાલાને...... ૧પ
પુનમે પરહરી જાશો માં અમને રે, વાલાને,
ભૂમાનંદ કહેભામીની જોઇ જીવે તમને, કહો નંદલાલાને...... ૧૬