સખી જોને હસી હળવે હરિવર, ખાંત ધરી ખેલે... °ટેક
પ્રેમવતીનો કર પકડીને નાચે શ્રી ઘનશ્યામ,
પગ ઠમકે, ઘણી ઘમકે, ધરા ધમકે, જોઇ ચમકે,
સખી રુમઝુમ રુમઝુમ નેપૂર વાગે, રસિયો રંગ રેલે... સખી° ૧
થન થન થન થન નાચ કરીને ચિત્ત હરે ચિત્ત ચોર,
બોલે કાલું, લાગે વા'લું, તે નિહાળું, દુઃખ ટાળું,
સખી ધર્મકુંવરને નિરખી રતિપતિ માન સરવ મેલે... સખી° ૨
ઝબલું ને ટોપી શિર શોભે, કંઠે મોતી માળ,
ખભે પટકો, મુખ મટકો, કર લટકો, ઉર અટકો,
સખી મુજ સામું મરમાળો નિરખી, છળ કીધું છેલે... સખી° ૩
સૂંથણલી પહેરી સોનેરી, ભારે ભભકાદાર,
રૂડી નાડી, ન છૂપાડી, છે અગાડી, જોઉં દાડી,
સખી ફર ફર ફર ફર ફૂદડી ફરતાં, તનના પટ ફેલે... સખી° ૪
બાળલીલા કરીને બહુનામી, હૈડામાં હરખાય,
સુખદાતા, જુવે માતા, જગત્રાતા, મુખ ગાતા,
સખી પ્રાણ હરી પરવશ કીધાં છે, અમને અલબેલે... સખી° ૫
વિશ્વવિહારીલાલજી અમને, આપો સુખ અખંડ,
બહુ કાળ એ દયાળ, જીવો બાળ, પ્રતિપાળ,
સખી શીશ નમાવી આશિષ દઇએ, ભામિની થઇ ભેળે... સખી° ૬