મોહન ગયા મન માનીને મોલે, તજી અમને ત્રિકમજીરે૩/૪

મોહન ગયા મન માનીને મોલે, તજી અમને ત્રિકમજીરે,

અલબેલાજી વિના અમે, કોને કરિયે કેમજીરે. ૧

વાલા વિયોગે વ્રેહ વહ્નિમાં, તપે ઘણું ઘણું તનજીરે,

સૈ પેર્યે સુખ લૈયે શરીરે, પાસે નહિ પ્રાણજીવનજીરે. ર

રસિયા વિના રજતિ સજની, વેરણ્ય કેમ વિહાયેજીરે,

ગિરધર વિના ઘડી ઘણું વળી, જુગથી મોટી જાયેજીરે. ૩

નથી રેવાતું નાથજી વિના, અમે એકલડાં આજજીરે,

તેડી લાવો કોઇ ત્રિકમજીને, વેલા આવે વ્રજરાજજીરે. ૪

શાને માટે શામ સલૂણે, રોશ રાખ્યો અમ સાથજીરે,

અબળા ઉપર એવડું, વાલા ન ઘટે મારા નાથજીરે. પ

અમારે તો તમે એકછો, ઠાકૂર ઠરવાનું ઠામજીરે,

નિષ્કુળાનંદના નાથજી, છો શામળા સુખનું ધામજીરે. ૬

મૂળ પદ

મંગલ મૂર્તિ મહારાજની, ગોલોક પતિ ગોપીનાથજીરે

રચયિતા

નિષ્કુળાનંદ સ્વામી

ફોટો

કિર્તન ઓડિયો / વિડિયો યાદી

કોઈ ઑડિયો / વીડિયો ઉપલબ્ધ નથી