પદ ૧૯(રાગ મહાલ-તાલ દાદરો)
પદ ૧૯
મહા મંગળકારી, મૂર્તિ તમારી, દેવ મોરારી દુઃખ હરો દીનાનાથ;
નિજ સેવક ધારી, લેજો ઉગારી, તમ ઉરવારી દુઃખ હરો દીનાનાથ.
સર્વના કારણ, ભવ જળ તારણ, દોષ નિવારણ નાથ;
ભક્ત ઉદ્ધારણ, દુષ્ટ સંહારણ, જીવન ઝાલો હાથરે -મહા.૧
સુરનર નાયક, સંકટ સહાયક સુખદાયક શ્યામ;
ભજવા લાયક, પામવા લાયક, સુંદર સુખના ધામરે.-મહા.૨
કાળના કાળ, શરણાગત સ્વામી, પ્રણતજન પ્રતિપાળ;
અનાથ નાથ, સદા સુખસિંધુ, ભક્તિ ધર્મના બાળ રે.-મહા.૩
ચરણ તમારા, સેવીને સ્વામી, સુખી થયા છે અપાર;
વિપત વામ્યા રે, આનંદ પામ્યા, અનેક નર ને નાર રે-મહા.૪
ભક્ત પ્રહલાદને કારણ ધરીયું, શ્રી હરિ નરસિંહ રૂપ;
વજ્રના સ્થંભમાં વપુને ધારી, મારીયો મોટો ભુપરે—મહા.૫
ભક્તોના વહાલા ભક્તિના લાલા, ભક્તોના રાખો માન;
ભક્તોની વ્હાંરે ચઢો વનમાળી, કેશવ કૃપા નિધાન રે.-મહા.૬
ગાંડો ઘેલો હું ભક્ત તમારો, ચરણનો ગરજુ ગુલામ;
નારણદાસને સેવક ધારી, દયા કરો ઘનશ્યામ રે—મહા.૭