પદ-૧
પદ-૧૦૯(રાગ :પૂજું ગણપત ગુરુ દેવ, કરું શારદાની સેવ
મહાદેવનકા દેવ, માત તાત અમેરા)
પ્રભુ ચરણ લાગું પાય રહો હ્રદિયાની માંય,
મારું શ્રેય સહુ થાય જાય દુઃખ અમારાં;
ગુણ ગુણવંત ગાય શુક શારદા સદાય,
જોગી જપે વનમાંય નિત્ય નામ તમારાં.પ્રભુ.૧
મહા માયાની પાર અતિ તેજનો અંબાર,
દિવ્ય સિંહાસન સાર તેમાં નાથ બિરાજે;
અક્ષર બ્રહ્મના આધાર દિવ્ય સદાય સાકાર,
ગુણ ગાય વેદ ચાર નાદ અનહદ વાજે.પ્રભુ.૨
ઉડે અનંત બ્રહ્માંડ એક રોમમાં અખંડ,
એવું અક્ષરનું પંડ તેના નાથ નિયંતા;
નહિ કાળ કર્મ દંડ અતિ આનંદ અખંડ,
જેના પ્રેમમાં પ્રચંડ મહા મુક્ત રહન્તા.પ્રભુ.૩
એવું અક્ષર અપાર ગુણાતીત અવિકાર.
તેના આપ છો આધાર સર્વ સુખ કરંતા;
સ્થિતિ ઉત્પત્તિ સંહાર કરો છો જ વિશ્વાધાર,
હરો છો જ ભૂમિ ભાર દાસ દુઃખ હરંતા.પ્રભુ.૪
મહામુક્ત અગણિત સેવે ચરણ તેનાં નિત્ય,
મારે તેની સાથે પ્રીત બડાં ભાગ્ય અમારાં;
અપરિમિત માયાતીત સુખ ભોગવે અમિત,
નહિ ઉષ્ણતા ને શીત એવાં ચરણ તમારાં.પ્રભુ.૫
જેહી બાવનની બહાર મન વાણી થકી પાર,
તેણે ધર્યો અવતાર અનેક જીવ તારવા;
આવ્યા પૃથ્વી મોઝાર થયા ધર્મના કુમાર,
સ્થાપ્યો ધર્મ સદાચાર જન કાજ સારવા.પ્રભુ.૬
અગોચર ને અગમ તે થયા છે સુગમ,
પુરુષોત્તમ પરિબ્રહ્મ માત તાત જગતના;
માગું ચરણ સેવા મમ આપો જન્મો જનમ,
વળી સંત સમાગમ પુરો ભાવ ભક્તના.પ્રભુ.૭
દયાનિધી કરી દયા નર રૂપ નાથ થયા,
ત્યારે તાપ તરણ ગયા નિજ સંત જનના;
કહે નારાયણદાસ આપો સમિપમાં વાસ,
મારી પુરો સહુ આશ, હરો ત્રાસ તનના, પ્રભુ.૮