અંતે ઉઠી જાવું એકલું, મેલી ગામને ગરાસજી;૪/૬

 પદ-૧૫૬

અંતે ઉઠી જાવું એકલું, મેલી ગામને ગરાસજી;

ધનરે દોલત દારા દિકરા, મેલી મરી જવું ખાસજી.                અંતે.૧

છત્રપતિ તે ચાલી ગયા, રાજ મુકીને રાજનજી;

હજારો અધિપતિ આગળે, ગયા છોડી સદનજી.                     અંતે.૨

અયુત હસ્તિ ઝૂલે આંગણે, ઘોડા ઊંટ અપારજી;

એવા રે મરી ગયા માનવી , જાતાં લાગી નહિ વારજી.            અંતે.૩

નોબત નગારાં તે ગડગડે, સદા શરણાઇ ઢોલજી;

એવા રે મરી ગયા માનવી, મૂકી સોનાના મોલજી.                  અંતે.૪

રંગિત મોલ રળીયામણા, બહુ બંગલા ને બાગજી;

એવા રે ગયા જખ મારતા, ગાતા છત્રીશ રાગજી.                    અંતે.૫

ફૂલાં ખોશીને ફરે ફાંકડા, આંજતા નિત્ય આંખજી;

વરણાગી કરતા તે વહિ ગયા, રણમાં થઇ ગયા રાખજી.          અંતે.૬

શૈયા પલંગે પોઢતા, જમતા વિધ વિધ અન્નજી;

એવારે મરી ગયા માનવી, મહા રૂપ રતનજી.                          અંતે.૭

એવી દશા જ્યારે આવશે, ત્યારે કોણ કરે સહાયજી;

નારાયણદાસના નાથજી, ભજે ભવ દુઃખ જાયજી.                     અંતે.૮

 

મૂળ પદ

જમડા જરૂર લેવા આવશે, લેશે સાંજ સવારજી;

રચયિતા

નારાયણદાસ

ફોટો

કિર્તન ઓડિયો / વિડિયો યાદી

કોઈ ઑડિયો / વીડિયો ઉપલબ્ધ નથી